|
|
|
| Written by Senen Salcedo | ||
| Friday, 27 July 2007 | ||
|
Magayon gayod kin agko kita i-share na mga istorya ko pagdakulo ta sa Nabua, mga istorya na naro-romroman ta ko mga nasa eskwela pa kita. Ako palan taga La Opinion pero nag poon sa pag eskwela sa centro na. Naroromroman ko nag Day Care ako ki Maam Dita Tesnado.Nayko, naka tolong taon ngani ako kanya ta so una bulan-bulan sana ta mala ko pa man ka egin. Gusto ko sana man na mag sabay-sabay ki hermanong Homer. Naroromroman ko na so bag ko ngani kadto a mga butang dyaryo sana man, basta sana agko mabitbit pag eskwela. Sadto kami kadto pag ka klase Descalso Building (Post Office na ngowan), minsan sadto Gabaldon Building. Si Mama (Patricia Salcedo) kaya sadto munisipyo man pagtatrabaho kaya kaiba na sana man kami kin mig trabaho iya. Sunod na taon, sadto na kami gilid ko simbahan, kaabay ko Health Center,medyo toltol naman ako pero underage pa kaya dere naka pag Grade 1, ka batch ko kadto sira si Nerissa Realco, taga San Isidro, saka si Rosievic Ladaw. Sirang darwa nag Grade 1 na ako man natagak pa ta underage ngani. Last year ko ki Mam Dita, ka batch ko na si Numeriano Samar Jr, Aileen Lanzuela (si Benhur kadto bulan-bulan man). Sige namo kadto silong kin agko guraan na mi-misan sadto simbahan. An pati bagang istorya sa egin dawa ono pinapatulan. Agko istorya na kaya nagraan ta nakatolon kuno sa tinidor (grabe).Syempre permi man kami kadtong sagana sa feeding, isi man gad ninyo adto...bulgor atbp. Katakot ko kadto ki Pulito (tagal) saka ki Pila, siguro bistado man ninyo kin siisay sira. Naroromroman ko na so paradahan ko mga jeep na pa Topas, Tandaay,Malawag, Balatan sadto kinatotogrokan na ka Sampaguita and South Star Drug ngowan. Agko pa ngani sadto kaonan ana ngaran NODCA (Nabua Operators,Drivers and Conductors Association). Masiram baga mga luto sadto.Saka sadto ki Viring Gallarte (Dayupay) (kaabay kadto basketbolan). Elementary, sa Central na ako. Garde 1 ki Mam Nitz Hernandez, room namo kadto amo na office ngowan ka Supervisor. Grade 1 ako nakatood na mag sintas sa sapatos! Grade 2 ki Mam Ester Occiano, room namo sadto arani ko 2nd gate and grandstand. Grade 3 ki Mam Beth Largoza, room namo sadto na luyo ko field, amo adto taon na agko na kami ibang teacher sa ibang subjects, si Mam Luz Priela na amo man sana adviser ko Section B. Imbes na so teacher amo na sana magbalyo sa room, kami pang mga eskwela mig balyo sadto room nira. Kaipuwan pati naka form sa line ta kindi maooditan syempre. Agko kami kadto 2 na bagong kaklase na talagang matitibay, si Aisha Bornas (maku-apo ni Sir/Mam Bornas sadto atubangan ka Central), saka si Grace Evano. Pareho sirang matibay, pinasuko kami ngamin, sirang darwa tie na nag 1st honor. Grade 4 ki Mam Virgie Onate, SPED-FL Class (Special Education-Fast Learners),man (kuno) 25 sana kami kadto sa klase.Syempre di ko malingawan na nakatood man ako kadtong mag bisekleta, courtesy ko bike ni John Lopez (nasa Ohio na iya ngowan). Narorom-roman ko na amo adto so taon (1982) na inintroduce ana STORK candy, dakol mga sample na tinao kanamo kadto. Amo man adto so taon na naka iba ako sa NCPS Children's Choir under ni Mam Julita Biares, na hanggang sa pag Grade 6 ko member ako, nag 2nd Place (on my last year) sa Regional NAMCYA competition sa Naga. Grade 5 ki Mam Elena Oliva, room namo sadto talikuran kadto Grandstand. Pag abot ko sa Grade 6, section B na ako (by choice). Sadto ako ki Mam Purita Escuro, ka klase ko sira si Glenn Tosoc (nasa NY na iya), Julito Sernal II, Manolet Tijam. Grade 6 naging "Ikalawang Prinsipe ng mga Puso ' 85" ako na naging kapadis ko Grade 2 pa sana kaya oman kasasadit!, Si Jed Sumayo amo Unang Prinsipe. Batch '85 kami sa Central. Sa High School,Batch '89 kami. Syempre dere ko malingawan so mga activities namo kadto. Kami so unang batch sa NNHS na agko interview sa entrance exam. Pinapabasa saka pinasusurat tanganing makapasar.First year, medyo pakiramdaman pa kaming magka-klase ta dakol kaya galin sa ibang schools. Room namo kadto sadto War Damage Building, Room 24, under ni Mam Eleanor Regalado. Naging kandidato ako kadto sa Freshmen Governor sa NAHISGO (Nabua National High School Student Government) kaiba sa party ni Django Escuro, kalaban ko si Leo Bolivar na pinahanga so mga teachers saka estudyante ko mag speech iya ta tinung-tong sa silya tanganing maabot so mic. Kaya oman naraog ako sa 20 votes. Nag recount pa ngani ta so una nag tie kami, adto palan agko osad na section na dere na count. Ako sana kadto naraog sadto party namo (SUPOG!). Amo man adto so mga panahon na so CSPC students nakiki gamit kadto mga rooms sadto War Damage Building, kaya dapat bakante na so room pag alas singko, ta sira naman amo mig gamit. Naroromroman ko permi kami kadtong nakasilong sadto site ngowan ka CSPC ta pinagraragaan pa sana yan. Agko naman sadto darwang kubo na ginagamit ko mga pioneer sa CSPC.Pero look at them now, asensado na. Amo man adto so panahon ko original EDSA revolution. Pag abot ko 2nd year medyo mairak kami kadto ta maski kami amo so Star Section, oda kami sadiring room - squatter sana kami. Perming pabara-balyo every subject, ta kami amo totoyo ko mga maestro, maestra namo. Adviser namo kadto si Mam Nicocila Ani (first year of teaching). Agko kami kadto free time na 2 hours pag apon. Ana ginigibo namo kadto, mag basa sa komiks sadto ki Nillum's. Perfect attendance so mga boys, tapos mig kaon sa Spanish Bread or Monngo bread sadto Nillo's Bakery. Pero dere oman kami nag cut sa klase dahil sana sa komiks, ka mga toltol man namo kadto. Third Year namo adviser si Sir Pilo Regala (Geometry!), room namo so ikarwang room pag galin sa main gate ka NNHS.Third year naging active naman sa extra-curricular. Naging Senator (sa wakas , nanggana!) sa NAHISGO, Team Leader sa Science Fair na naging 4th Place (out 0f 27) sa Regional level na ginibo sa Cam.Sur National High School sa Naga. Sadto kami na-trap ko Bagyong Sisang. Amo man adto so taon na oda kami JS Prom ta nagbagyo sa Sisang, malang kusog, grabe so baha - 3 weeks na oda klase, 2 months na oda kuryente. Excited man kintana kami kadto ta kami baya so Junior tapos, oda JS, dere basang logod naka bayle. Fourth year, adviser namo si Mam Deling Hermoso, balik kami sa War Damage Building, Room 30. Nag kandidato na naman ako (oda kararay-an!) sa NAHISGO, this time Vice President na, amo namo for President si Acila Aleman (Mrs. Llorin na iya, agom ni Jojo)na amo namo naging Valedictorian (Math teacher na 'ya sadto NNHS). Naraog kami kadto ko tandem ni Isagani Bregala (2nd Section) saka ni Adam Fajardo na Third Year kadto (nangerak na, raog na naman!). Sa Science Fair nag 3rd na kami sa Regional level, at least nag improve. Agko kami kadto band (STEROLC Band), ana ngaran galin sa binaliktad na letters sa osad na produktong chewing gum, CLORETS na inintroduce kadto taon na adto (1988). Syempre dahil sa training sa Choir kaya ako naging lead singer man kuno (kamaturan, ana main reason, dere kaya ako tat-ta-o sa mga musical instruments, hehe) Unang kinanta ko, sikat kadtong taon na adto, Light and Shade by Fra Lippo Lippi. First time kong kumanta sa solo in front of big audience kaya agko ako mga lyrics na nalingawan (ngeeee!) Kami so batch na talagang mainit so labanan sa Honor Roll, every year kaya iba-iba so nag ta Top, kaya boot sabiyon dakol ana matibay, ngani? Sa graduation namo sa High School, na-disappoint ako na di naka loog sa honor roll kaya nag ono-ono ko, dere ako nag attend ko graduation ceremonies, nag silong sana 'ko!. Kami man palan so batch na nag initiate sa fund drive thru carolling (Christmas '88) para ka NNHS stage sa atubangan ka Pasig type Building. Ka Batch ko pa na mga teachers na ngowan sadto - sira si Preciosa Velasco-Pontillas, Korina Fernandez-Almazan etc. Ka Batch man palan namo si Fr. Manny Zagada. Nag reunion kami 15th year ko 2004, medyo less than expected so nag attend ta ngamin kaya nagpopoon sa pag pamilya. I hope sa 2009, sa 20th year namo, mas dakol na ana mag attend. Almost every year naka pauuli man ako sadto Nabua, magkaka binaydan man mga kabisto and barkada. Syempre very happy pag nasa Nabua. Nayko, napa siram na ako sa istorya, boring na gad kaninyong mga nagbabasa. Sige tama na ngona, kamo naman amo mag istorya, ako gusto kong makapag para basa lalo na kin mga isi ko o bistado ko ana mga nasasambitan.
|
||
| Last Updated ( Saturday, 23 February 2008 ) | ||
| < Prev |
|---|
